Føroyar hava ein serligan fyrimun innan gransking

Millum stóru trupulleikarnar hjá flestu londum í vesturheiminum er versnandi fólkaheilsa.
‍
Ein samanrenning av ov lítlari kropsligari rørslu, ringum kostvanum, sálarligum trupulleikum og m.a. royking hevur stórar heilsuligar kostnaðir, bæði fyri einstaklingin, familjuna og samfelagið.
Av hesum orsøkum missa nøkur síni nærmastu alt ov tíðliga. Onnur gerast sjúk ella óvirkin, sum í eitt langt áramál tyngir bæði tey sjálv, familjuna, og heilsu- og almannaverk.
‍
Umframt menniskjaligar kostnaðir, so er eisini talan um stórar fíggjarligar kostnaðir fyri heilsu- og almannaverk og hartil kostnaðir av mistari arbeiðsorku í samfelagnum. Hóast neyv tøl ikki eru tøk, so er greitt, at sokallaðar ikki smittandi sjúkur (non-communicable diseases) ella lívsháttarsjúkur hvørt ár kosta føroyska samfelagnum hundraðtals milliónir krónur.
‍
Øll lond í vesturheiminum dragast við somu trupulleikar, sum í dag raka økir um allan heimin, og av somu orsøk er støðugur og vaksandi dentur á at gera „íløgur“ í at betra um fólkaheilsuna – ein íløga, sum gevur okkum og øllum samfelagnum avkast.
‍
Ymiskt er, hvussu skipanir fyri at betra um fólkaheilsuna verða settar í verk.Tey flestu londini í vesturheiminum hava stovnar líkum okkara Fólkaheilsuráði, sum arbeiða við kunning og átøkum fyri at bøta um fólkaheilsuna. Hóast okkara Fólkaheilsuráð ger eitt sera gott arbeiði, so er greitt, at nógv størri dentur má leggjast á at bøta um fólkaheilsuna í Føroyum.
‍
Fram um størru londini í vesturheiminum hava vit í Føroyum fyrimun av, at vit eru eitt lítið samfelag, sum hóast støddina er skipað eins og flest onnur framkomin lond á okkara leiðum. Fyrimunurin er serliga, at fjarstøðan frá landsmyndugleikum út til landstovnar, starvsfólk og brúkarar er sera stutt. Hetta merkir eisini, at tað er lutfalsliga lætt at fáa eitt heilt samfelag at seta í verk skipanir ella átøk, sum hava týdning fyri alt landið – hetta eru tiltøkiniog átøkini í sambandi við koronuheimsfarsóttina eitt gott dømi um.